MIRROR於3月份首度全球發行英文單曲《RUMOURS》，更被網民發現日本街頭竟然有個由Sony Music推出嘅黑白大型廣告板，睇嚟為衝出香港做好準備。日本大型音樂平台THE FIRST TAKE昨日（4日）突上載柳應廷（Jer）及李駿傑（Jeremy）獻唱預告，表示影片將於今日（5日）香港時間晚上9時上架。雙Jer係繼陳柏宇後，登上THE FIRST TAKE演唱嘅香港歌手；預告中，Jeremy不時深呼吸，表現相當緊張，又詢問Jer準備好未：「加油！加油！O唔OK？」當Jer表示OK後，佢哋就作出自我介紹：「Hello！大家好，我哋係MIRROR！」隨後，Jeremy做出OK手勢示意可以開始。


MIRROR官方社交平台亦有轉載相關片段，又表示今晚8時45分雙Jer會開Live同大家一齊睇首播。網民對於Jer及Jeremy登上THE FIRST TAKE表示相當期待，又大讚二人唱功：「為你們兩個感到驕傲」、「等不及要看Jeremy和Jer的表演了」、「太驚喜了」、「Jer and Jeremy!!!! 香港之光！！！」、「Jeremy其實係全Mirror唱得最好嗰個」、「Jer品質保證」等等；不過都有部分網民對於THE FIRST TAKE邀請Jeremy和Jer感到無言：「Pr野」、「商業操作，有乜出奇」、「天啊，完全無語」、「聽唱功既時候到了」等等。


Jer、Jeremy曾於3月份到日本工作，估計片段喺係當時錄製，而當時姜濤及Anson Lo亦有同行，Anson Lo又於社交平台限時動態PO出4人與花姐嘅合照，並留言：「Big Project.」，但表示暫未可以透露，遲些大家就會知道。有網民估計姜濤及Anson Lo可能都有份參與THE FIRST TAKE錄音。